Ajan Acha

2026.06.08

Rezime Pòs lan
Pòs Ajan Acha (AA) a se yon manm kle nan ekip Sant Pwofesyonèl Extollo a, k ap akonpli plizyè tach ki lye avèk planifikasyon epi fè acha. Ajan Acha a, anba sipèvizyon Direktè Jeneral lan ap sipòte lidèchip, responsab pou l fè tout acha ki konsène Konstriksyon, Chòp Soudi an, Sant Pwofesyonèl lan, Garaj lan, ak Administrasyon an. Li dwe genyen sans responsablite, kapasite pou l kwòdone ak montre efikasite nan
itilize zouti travay dijital Extollo yo, tankou Microsoft Word ak Excel, Asana, Slack, Zoom, ak aplikasyon Google Drive yo.

Responsablite Prensipal
Faktè desizif enpòtan pou Ajan Acha a pou entegre Extollo se epouze vizyon, misyon ak valè òganizasyon an. Nou bezwen yon pwofesyonèl avèk bon jan konpetans nan planifye, òganize, ak kwòdone acha yo nan limite deplasman yo ak respekte bezwen depatman yo.

Sou baz sa yo, men sa travay esansyèl Ajan Acha a ye :

• Kolekte ak revize rekizisyon acha yo, prepare bondkòmand yo, ak fèkòmand materyèl ak sèvis.

• Chache ak evalye founisè nou ka travay avèk yo sou konsiderasyon serye ak pri yo; jere yon bazdone de tout founisè nou ka travay avèk yo.

• Siveye nivo stòk lan ak swiv arivaj yo pou anpeche ripti stòk ak twòp acha; kwòdone avèk Administrasyon an, Konstriksyon, Chòp Soudi ak Garaj lan pou apwovizyonnman.

• Fè si ke tout acha yo an konfòmite avèk politik konpayi an; kenbe yon rejis egzak de tranzaksyon yo ak pèfòmans founisè yo.

• Kode resi yo daprè bondkòmand ki te soumèt yo.

• Fè acha yo avèk efikasite pou evite deplasman ki pa nesesè.

• Siveye pwosesis dedwànman atik MFI yo pou rekipere yo kou pwosesis lan fini

• Nan tèt kole avèk Administrasyon an, fè swivi labank lè sa nesesè.

Rapò Yerachik

Anba sipèvizyon Direktè Jeneral lan, Ajan Acha a, travay tou an kolaborasyon avèk Administrasyon, Sant Pwofesyonèl la, Chòp Soudi an, ak Garaj lan pou yon bon jesyon achat yo.

​

Deklarasyon Konfòmite Konpayi a:
Nan egzekisyon tach ak responsablite yo chak genyen, Y ap tann de tout anplwaye pou yo fè bagay sa yo:

 

• Angajman a kilti konpayi Extollo a.

• Ouvèti lespri sou lide ki nouvo, volonte pou pran risk, matirite pou aksepte lè yo gen tò.

• Bay travay kalite nan delè ki te fikse avèk oswa san sipèvizyon. Pran inisyativ ak reyisi ladann se kle.

• Enteraji yon fason pwofesyonèl avèk lòt anplwaye yo, kontraktè, donatè, founisè, ak lòt patnè.

• Travay efikasman kòm yon moun k ap kontribiye nan yon ekip nan tout travay.

• Travay avèk otonomi nan bon jan konprann nesesite pou kominike ak kwòdone efò travay yo avèk lòt anplwaye ak òganizasyon.

​

Kalifikasyon nou bezwen lakay pwofesyonèl lan

• Kapasite ak pwofil pou w rezoud pwoblèm ak jwenn solisyon.

• Bon konpetans aloral e alekri pou kominike avèk depatman yo ak founisè yo.

• Presizyon nan jesyon acha yo, kontra yo, ak anrejistreman tranzaksyon yo.

• Pou piti yon diplòm bak + 2 lane nan jesyon, kontablite owa nan yon disiplin ki nan menm chan an.

• Konesans nesesè de materyèl ak ekipman konstriksyon.

• Metriz nan MS Office (Microsoft Word, PowerPoint, and Excel) ak potansyèl epi volonte pou vin metrize Asana ak Slack.

• Bon konpetans aloral e alekri nan anglè.

• Kapasite pou konekte avèk ekip lan ak bati relasyon avèk founisè yo.

• Detantè yon lisans tip AC omwen.

• Kapasite demontre pou kondui machin. Kondui moto tou se ap yon plis.

​

Voye Aplikasyon w
Tanpri voye CV w ak yon lèt kouvèti nan fòma Word oswa PDF a bureau@extollosa.com avèk “Ajan Acha” nan liy onjè a.